Библия » Пераклад Антонія Бокуна
Исход 38 глава
1 І зрабіў ахвярнік цэласпаленьня з дрэва акацыі, пяць локцяў даўжыня яго і пяць локцяў шырыня яго, ён чатырохкутны, і тры локці вышыня яго.
2 І зрабіў рогі ягоныя на чатырох вуглах ягоных, з яго выходзілі рогі ягоныя; і пакрыў іх медзьдзю.
3 І зрабіў усе начыньні ахвярніка: гаршчкі, лапаткі, місы, відэльцы і кадзільніцы; усе начыньні ягоныя зрабіў з медзі.
4 І зрабіў да ахвярніка крату, плеценай работы, мядзяную, пад вобадам зьнізу да паловы яго.
5 І выліў чатыры колцы на чатырох вуглах краты мядзянай, каб укладаць насілы.
6 І зрабіў насілы з дрэва акацыі, і пакрыў іх медзьдзю.
7 І ўлажыў насілы ў колцы на баках ахвярніка для нашэньня яго імі. Пустым унутры зрабіў яго з дошак.
8 І зрабіў мыцельнік мядзяны і падставу ягоную мядзяную з люстэрак жанчынаў, якія зьбіраліся каля ўваходу ў Намёт Спатканьня.
9 І зрабіў панадворак: з паўднёвага боку, што глядзіць на поўдзень — заслоны з кручанага вісону ў сто локцяў,
10 слупоў да іх дваццаць і падставак да іх дваццаць мядзяных, а кручкі на слупах і клямкі да іх срэбныя.
11 І на паўночным баку — заслоны ў сто локцяў, слупоў да іх дваццаць і падставак да іх дваццаць мядзяных; а кручкі на слупах і клямкі да іх — срэбныя.
12 І з заходняга боку — заслоны ў пяцьдзясят локцяў, слупоў да іх дзесяць і падставак да іх дзесяць; а кручкі на слупах і клямкі да іх — срэбныя.
13 І з пярэдняга боку, што глядзіць на ўсход — адлегласьць у пяцьдзясят локцяў.
14 Пятнаццаць локцяў — заслоны з аднаго краю, слупоў да іх тры і падставак да іх тры.
15 І з другога краю, з іншага боку брамы панадворку — заслоны ў пятнаццаць локцяў; слупоў да іх тры і падставак да іх тры.
16 Усе заслоны вакол панадворку — з кручанага вісону,
17 і падстаўкі да слупоў мядзяныя, кручкі на слупах і клямкі да іх — срэбныя, і пакрытыя вярхі іхнія срэбрам, і ўсе яны павязаныя срэбрам, усе слупы панадворку.
18 Заслона для брамы панадворку — гафтаванае работы з блакіту, пурпуру, барвовага кармазыну і кручанага вісону, дваццаць локцяў — даўжыня яе, а вышыня і шырыня яе — пяць локцяў, падобна да іншых заслонаў панадворку;
19 і слупоў да яе чатыры, і падставак да іх чатыры мядзяных; кручкі іхнія срэбныя, і пакрыцьцё вярхоў іх і клямкі да іх срэбныя.
20 А ўсе калкі Сялібы і панадворку наўкола — мядзяныя.
21 Вось каштарыс Сялібы, Сялібы Сьведчаньня, які падлічаны паводле словаў Майсея працаю лявітаў пад рукою Ітамара, сына Аарона, сьвятара.
22 І Бэцалеэль, сын Урыя, сын Хура, з калена Юды, зрабіў усё, што загадаў ГОСПАД Майсею;
23 а з ім Агаліяў, сын Ахісамаха, з калена Дана, разьбяр і мастак, і вышывальнік на блакіце, пурпуры, барвовым кармазыне і вісоне.
24 Усяго золата, ужытага на работу, на ўсе працы ў сьвятыні, — а было гэта золата, ахвяраванае патрэсваньнем, — было дваццаць дзевяць талентаў і сямсот трыццаць сыкляў, паводле сыкля сьвятыні.
25 А срэбра ад палічаных у грамадзе было сто талентаў і тысяча сямсот семдзясят пяць сыкляў, паводле сыкля сьвятыні.
26 Бэка з галавы, значыцца, палова сыкля, паводле сыкля сьвятыні, з кожнага, хто прыйшоў, каб быць палічаным, ад дваццаці гадоў і вышэй, з шасьцісот трох тысячаў пяцьсот пяцідзесяці чалавек.
27 І было сто талентаў срэбра ўжыта на адліцьцё падставак сьвятыні і падставак заслонаў; сто падставак са ста талентаў, па таленту на падстаўку.
28 А з тысячы сямсот сямідзесяці пяці сыкляў зрабіў Бэцалеэль кручкі на слупах, і пакрыў вярхі іхнія, і злучыў іх клямкамі.
29 А медзі, ахвяраванай патрэсваньнем, было семдзясят талентаў і дзьве тысячы чатырыста сыкляў.
30 І зрабіў ён з яе падстаўкі да слупоў каля ўваходу ў Намёт Спатканьня, і ахвярнік мядзяны, і крату мядзяную да яго, і ўсё начыньне ахвярніка,
31 і падстаўкі панадворку наўкола, і падстаўкі брамы панадворку, і ўсе калкі Сялібы, і ўсе калкі панадворку наўкола.
Исход 38 глава в переводах